Nuberu actuará a partir de la una la mañana na nuechi máxica de San Xuan, qu´esti añu se cellebra nel embalse de Trasona, en Corvera, con un ampliu programa de música  y dando-y fuéu al barcu "Avanti", símbolu de los cuatro conceyos de la comarca d´Avilés. Corvera ye ensin dubia ún de los conceyos d´Asturies onde más veces actuara Nuberu a lo llargo de los sos trenta años de carrera.

Ayeri presentáronse el programa y la maqueta de la foguera./www.lne.es.

El programa musical de San Xuan entamará a les diez de la nuechi del llunes 23 cola actuación de la Banda de Gaites de Corvera, a la que siguirá l´actuación del músicu folk irlandés Michael McGoldrick.

Dempués del tradicional baille de la danza prima al rodiu la foguera a medianuechi, retomaranse les actuaciones con Mari Luz Cristóbal Caunedo y Nuberu, que tien prevista la so participación a eso de la una la mañana. Spanta la Xente pondrá el puntu final a la nuechi de San Xuan, que finará, polo menos oficialmente, a les cuatro la mañana, momentu en que s´apagará la foguera.