¿Cantaben los mineros del 34 canciones de Nuberu?
13/05/08

Así parez, si vemos la serie de Juan José Campanella Vientos de Agua, qu´acaba d´emitir la televisión autonómica asturiana. Tantu nel primer episodiu como nel últimu, los mineros asturianos canten nel chigre y na mina "Se arreglará", un canciu de Nuberu del añu 1987.

La serie, un trabayu de calidá maltratáu en so día per Telecinco, entama cola típica escena de chigre nel que grupos de mineros y parroquianos falen ente risotades, echen la partida y canten al alto la lleva. Y lo que canten, a cachos y como fondu ye la primer estrofa de "Se arreglará", esa que diz:

Dícesme que quies a otru

dícesme que tien carrera

que yo soi solo mineru

pero mineru primera

                                                        ¿Cantaben los mineros del 34 "Se arreglará"?

 

Bastante más nidia se oye otra parte del canciu nel últimu y peremotivu capítulu de la serie, cuando Andrés Olaya torna a la so tierra dempués de setenta años na Arxentina. Acosáu pelos pantasmes del so pasáu mineru, el vieyu Olaya baxa col so fíu Andrés a la mina imaxen del Muséu de la Minería de L´Entregu y, ya enantes de empezar la visita, ve cómo un grupu de mineros de los sos recuerdos del 34 se acerca per una de les galeríes cantando a coru esti otru cachu de “Se arreglará”:

   

Si tien arreglu, se arreglará

Si nun lo tien, arreglao ta.

En la mina el vigilante

Grítame que despabile,

En casa grítesme tú

Que escarrile, el que escarrile.

Si tien arreglu, se arreglará,

Si nun lo tien, arreglao ta.

Aquí enterróse mio ma,

Aquí en este tierra negra...

Ehí fina´l cantu de los mineros del 34 nel Muséu de la Minería. Ye un misteriu cómo foren a saber ya d´aquella la lletra de Tomás Martínez Nuño. Seguramente que-yos pasaron mui oportunamente el cassete de Mineros que se vende nel propiu Muséu. En cualquier casu, tou se-y perdona a esti trabayu de Juan José Campanella, al que por fin se-y fizo la xusticia del ésitu na televisión arxentina, na TPA y coles ventes del dvd.

Tomamos el gazapu como otru tributu más pa la despidida. Arreglao ta.