1. AIDA LAFUENTE 5,21
  2 .D' AYERI A GÜEI 6,33
  3. DAME TIRA 2,41
  4. SER ASTURIANU 2,54
  5. EL POZU MARÍA LUISA 6,12
  6. NAVIDÁ DEL 0,7 3,42
  7. NUN HAY TAL ANDAR 4,10
  8. DELINA 3,40
  9.LLIBERAR L'AMOR 2,51
10. LA CARBONERA 5,17
11. CHALANERU 3,38

AIDA LAFUENTE  

Deciséis años tinía
guapos años gayasperos
que xueguen y salten 
semeyando xilgueros.

Yeres una neña Aida
que na rexón asturiana
xugabes dando a la comba
ú tos amigues saltaben.

Llegó la güelga d'Abril
fuste revolucionaria
tu ya nun coyiste comba
que coyiste la metralla.

Colos pergafos mineros
qué bien tú la remanabes
salíes colos primeros
bricando per barricaes.

Y cuando más s'encendín
los glayios n'amarraza
dieste col llombu na tierra
furó to pierna una bala.
Dos mozos los comunistes
quixeron dir a salvala
¡valoratible so vida!
¡so vida de llibertaria!

Nun hubo quien lo algamara
rabiones de metralleta
sos cuerpos afuracaron
a la vera la rapaza.

Ya lleguen los asesinos
"¿tú como te llames guaja?"
tú dixisti puñu enriba:
"¡¡ comunista, llibertaria !!"

Nun acabasti decilo,
la to voz nun vocinglaba
del menudín del to cuerpu
fixo un cribu tanta bala.

Y esi vestidín tan guapu
coles manches encarnaes
guardaránlu con gran ciñu
to má y la bona la to hermana
Serás de los asturianos
l'exemplu de la so casta
y has ser de los mineros
so bandera proletaria.

Pola sangre que vertiesti
xorrecerán más rosales
nesta rexón asturiana
con roses bien colloraes

Y nel 14 d'Abril
glayarán per toa España
les mocedaes marxistes
coses de La Llibertaria.

       
        Lletra: popular   
Son: Alberto del Pozo

D' AYERI A GÜEI

DAME TIRA  

Cuando tea apechugando
per fuera de la mina
lo mesmo que per dientro
¡Compañeru, dame tira!

Cuando sepias que toi presu
per da-y llibertá a la vida
como si non lo tuviere
¡Compañeru, dame tira!

Cuando al aire los polmones
tarácelu la caliza
semeyando bon aliendu,
¡Compañeru dame tira!

Cuando me retiren ya
y sólo seya un pensionista,
igual que si trabayare
¡Compañeru dame tira!

        Lletra: Manuel Asur    Son: Nuberu

SER ASTURIANU

Ser asturianu nun ye
dir con montera picona
nin saber echar bien la sidra
nin xubir a Covadonga.

Nun adornase con hestories
que son verdaes a medies
que de tanto ser grandones
creciéronmos les oreyes.

Yo nun maldigo les coses
que nos faen ser como somos
pero fai falta dicilo
qu'arimamos pocu l'hombru.
Siempre tamos dividíos
caún tira pal so sitiu
pa facer Asturies grande
vamos trabayar uníos.

Dende Oriente hasta Occidente
dende'l mar a la quintana
toles voces nuna
¡Viva la tierra asturiana!

Lletra y música: Victor Manuel San José Sánchez

EN EL POZU MARIA LUISA

En el pozu Maria Luisa
matáronse once obreros.
Mira, mira, Maruxina
¡mirái, como vengo yo!

Matáronse cuatro picaores
y los sos bragaos rampleros.

Vengo bañáu de sangre
de sangre d'un compañeru

Mirái mio camisa roxa
de sangre d'un compañeru.

Al diañu los capataces
acionistes y esquiroles

Toa la xente minera
de negro vistió dafechu

Mañana ye I'intierru
d'esos bragaos mineros.

NAVIDÁ DEL O,7

Navidá, la nieve blanca
regalinos y turrones,
tando toos aconceyaos
disfrutando de mil coses.

ESTRIBILLO
Vamos pensar en tol mundo
(pensemos en tola xente)
si hai que vivir compartiendo
nun podemos escaecemos
de los que viven sufriendo.

¡Navidá del 0,7!
Tenémoslo d'algamar
hai de ser más solidarios,
l'amor ye saber dar.
¡Navidá del 0,7!
Nun ye pidir caridá
ye'l drechu d'estos pueblos
que nun saben d'igualdá.

Con too aquello que mos sobre
nun podemos racaniar;
Sudamérica tien fame
ensin medios pa progresar.

Mui señores Reis Magos
nun lo vaigan a escaecer
l'equilibriu nel mundu
más que regalu, ye llei.

Mentanto qu'unos queden fartos,
otros nun xinten ni pan,
hailos que duermen na cama
y dalgunos que nin nel portal.

Nuechebuena nel Occidente
xaréu, folixa y paz;
mala nueche n'Etiopía
l'Africa siempre escaecida.

Lletra y música:  Julio Sánchez / Gabino Antuña

LLIBERAR L'AMOR 

Nun folleru alcontré l'amor
Tinía los güeyos esbillaos.
La voz cimblante.
El cuerpu oriciáu.
Peles pocilgues afalaba.
Peles cantarielles xorrecía.
Polos antros amoriaba...
Esti ye l'amor que nun se fixo.
L'amor perdíu.
L'amor nun declaráu.
Dir toos a facer l'amor?
Dir toos a remanecelu.
Dexái, amantes, les alcobes,
dexái, monxes, el llupanar.
Salíi, maníacos, del oligopoliu.
Que naide seya de naide
pa que toos faigan l'amor.

 Lletra: Manuel Asur
 Son: Nuberu

LA CARBONERA

Per un galán toi morriendo, que ye el meyor picaor,
el más valiente chisteru del grupu d'El Rimaderu
Que ye mina de carbón.
La carbonera yá muerre, yá muerre del mal d'amor,
por un mineru al que quier anque fuere lo que fuere
Ante too ye picaor.
Ye picaor de primera, el gallu la regaera
Y que gana perres a esgaya y darréu les espantaya
Por borrachu y calavera.
Nun tien la sangre xelá, ye bravu y trabayaor,
Peles nueches de xarana, él cancia La Llangreana
como el meyor cantaor.
L'amor tienlu enfotáu nesa prieta carbonera
y pregona so guapura, y pregona so guapura
Pelos chigres enfiláu.
Llegó-y un día la ocasión
Borrachu en vino y pasión, como llobu afamiáu
Al contrariu, namoráu,
furacó-y el corazón.
Dende entós, en prisión, atristáu cola condena
porque sabe que d'amor ena villa del carbón
yá muerre so carbonera.                          

  Lletra: popular
  Adaptación musical: Nel Xiblata
  Adaptación:Nuberu

CHALANERU

Chalaneru, chalaneru,
¿qué lleves ena chalana?
Llevo roses y claveles
y el corazón d'una xana.

Si pases el puente
nun caigas al agua,
que los mios amores
son de La Chalana.

Son de La Chalana, son
son del pueblín chalaneru.
Que si La Chalana muerre,
¡Llaviana, perdida yes!

Si pases el puente
nun caigas al agua,
que los mios amores
son de La Chalana.

Ena fonte La Nalona
hai una xana llorando
porque diz que nun la quieren
los rapacinos d'Entrialgo.