| Imprimir |

ENXAMÁS LLOVIÓ QUE NUN ABOCANARATrayectoria nuberu

 
 Va trenta años, el 18 de xunetu de 1978, dos ventiañeros de L’Entregu (Asturies), Chus Pero Suárez y Manolo Blanco Peñayos, presentaben nel Cine Sindical del so pueblu Asturies, ayeri y güei, el so primer disco como Nuberu.
Enantes d’eso, los dos coincidieran dientro les files del coleutivu cultural Camaretá, surdíu a mediaos de los setenta na cuenca minera del Nalón como mou d’axuntar inquitúes sociales y polítiques xunto a reivindicaciones llingüístiques a favor del asturianu y creatividá cultural n’estremaos ámbitos. Formando parte de Camaretá, Manolo y Chus Pedro subiéronse a pernomaos escenarios de la izquierda cultural asturiana como la carbayera de los Maizales de Xixón y formaron parte de la plataforma d’artistes del Partíu Comunista d’España, actuando na so fiesta de la Casa del Campu de Madrid nel añu 1977. Ye nel trescursu d’ún d’estos alcuentros nos que la voz de Chus Pedro y la guitarra de Manolo reinterpretaben con nuevos aires temes de la tradición asturiana, cuando’l cantautor asturianu Víctor Manuel propón al dúu grabar un discu, yá con nome propiu y singular. Asina naz Nuberu, echando mano del nome del Dios astur de les nubes, y surde d’esti mou Asturies, ayeri y güei (1978), una grabación histórica que supón un cantu a la solidaridá y al mundu del trabayu y pon el fondu musical a la transición política asturiana, metiendo yá entós como un instrumenru más la gaita de Manolo Quirós, y convirtiendoal grupu nun referente inescusable de la cultura d’aquel momentu. Tres la presentación del discu en L’Entregu y nel Teatru Campoamor d’Uviéu, Nuberu ufre decenes de conciertos nos que los temes como Dame Tira, Aida Lafuente o Lliberar l’amor conviértense n’auténticos himnos xeneracionales al poner voz a una nueva sensibilidá social, cultural ya ideológica nun momentu nel que s’aldericaba con munchu enfotu el papel d’Asturies na nueva España democrática.
El segundu trabayu discográficu de Nuberu, Atiendi Asturies (1980), al que se xunta un collaborador esencial na historia posterior del grupu como ye Julio Sánchez-Andrade, plantega una reflesión sobre la historia d’Asturies y una reivindicación de la so identidá como pueblu, que queda bien plasmada na canción Dios te llibre de Castiella, coreada nos conciertos que Nuberu ufre dende entós y hasta anguaño. Va ser ensin embargu otru tema del discu, el tradicional So vaqueiru, el que de siguida se convierta nun ésitu ensin precedentes, llegando a engolase, col so testu n’asturianu, na llista nacional de los Cuarenta Principales. Nel tercer trabayu discográficu, Cancios d’un país (1981), Nuberu adiéntrase nes raíces tradicionales asturianes pa rescatar temes como Per cuatro palos que di, Pastor que tas nel monte o Tengo de rondar tu valle, “relleíos” dende nuevos tratamientos sonoros y con unos plantegamientos estéticos.
Yá formando parte de la historia de la cultura asturiana y pasaos los años d’una efervescencia irrepetible que finó pa siempre con tantes trayeutories nacíes al so fervor, Chus Pedro y Manolo deciden a entamos de los ochenta reflesionar per un tiempo pa valorar otros caminos musicales y esplorar nueves víes profesionales, más granibles que les poco productives d’artistes comprometíos col asturianu y colo asturiano. Nesti tiempu, dende 1983 hasta 1991, será Chus Pedro quien caltenga’l nome de Nuberu y quien, arropáu por nuevos músicos como Gabino Antuña, siga ufriendo conciertos y espublize un disco monográficu sol mundu de la mina, Mineros (1987).
Pa sorpresa de munchos y alliviu de los sos fieles seguidores, n’abril de 1991 Manolo y Chus Pedro tornen a los escenarios xuntos como Nuberu presentando nel Teatru Campoamor d’Uviéu les canciones d’un nuevu trabayu conxuntu, Cómo tú yes (1 991). Ye l’aguardada y esitosa torna d’un grupu yá históricu nun reencuentru señaldosu. El disco resultante-el primer disco que se graba en direuto n’Asturies- recueye dalgunes de les canciones más conocíes de Nuberu, a les que s’añaden temes nuevos que van ser clásicos nel so repertoriu, como’l Cómo tú yes qu’entitula’l discu. Dos años dempués, Nuberu presenta Agua de la fonte clara (1993), una nueva reinvención de la tradición na que se xunten tonada, gaita, protesta, asturianismo, percusión tradicional y teclaos llétricos. Dos temes de Víctor Manuel, Agua de la fonte clara y Ser asturianu, tienen cabida equí al llau d’otros como Delina o El veleta. Llueu, sorprende col Árbol de Navidá (1 994), discu que xunta villancicos tradicionales asturianos como Nun hai tal andar con otros de nuevu cuñu, como Navidá del 0,7.
Zarráu en 1994 el capítulu de creación discográfica, la popularidá de Nuberu sigui, ensin embargu medrando col camudamientu de sieglu. Reconocimientu como’l que-y ufre l’Academia de la Llingua Asturiana, esitoses ediciones en cd de los sos primeros trabayos, el constante reclamu pa conciertos dientro y fuera d’Asturies y la participación en trabayos coleutivos como’l Tributo a Stukas o el Concierto de Asturias allarguen la trayectoria de Nuberu hasta’l sieglu XXI, recoyía pol escritor Benigno Delmiro Coto nel llibru Nuberu nel tiempu (2001). L’ésitu del discu en solitario de Chus Pedro, De ñublu y orpín (2003), va valir tamién pa dar a conocer a un públicu más ampliu la historia previa de Nuberu. Les nueves xeneraciones de xóvenes asturianos, munchos d’ellos fíos y nietos de los primeros siguidores de los ochenta y munchos d’ellos asitiaos fuera d’Asturies, nun ficieron más qu’acrecentar la popularidá y el significáu de Nuberu como filu de conexón con unes señes d’identidá que cobren mayor valor nun momento históricu como’l que vivimos.
Y, xusto agora, en 2008, diz Nuberu que marcha. Yá se sabía: enxamás llovió que nun abocanara. Pero como-y pasa al dios de la lluvia, de les nubes y de les llargues guedeyes que tomaron por nome va trenta años, yá ye mui tarde pal escaezu: Ta ente los mitos d’un país nomáu Asturies.
Gracies.