SO VAQUEIRU

So vaqueiru, so vaqueiru
Vivo ente la vaqueira
So fiyu de Xuan Barreiro
Nací en metá de la braña.

Lu que venga del marnuetu
y lu que venga del xaldu
pa la braña del vaqueiru
la mio parti dó-yla al diañu ¡Ey!

Vaqueirina, vaqueirina
La tua braña dondi queda,
allá arriba n'aquel altu
metía pa La Falguera ¡Ey ! 

Letra: Popular
Música: Popular
Del cancionero de B. Fernández
Adaptación: Nuberu

GOLVAMOS A ENTAMAR

Dende los mios suaños voi a vosotros
Yo, sólo, soi un home que quier cantar
tola esperanza d'esti país
cansáu, quiciás, de tantu esperar.
Yo a toos vos quiero,
y anque tenga priesa,
tomemos un vasu en cualquier llugar
brindemos por esta tierra
de duros fracasos,
dempués, ordenemos, atentos,
ca pensamientu
y golvamos a entamar
Ios llabores de la casa
de la seca tierra
d'esta cicatera, murnia
y espantible patria.

Letra: Manuel Asur
Música: Nuberu

SOLU

Dexó l'antoxana,
los cuetos, los castros...
La neña, ena villa.
Yo, aquí, atristayáu.

Alluendi, perlloñe
troneyen campanos
de les xates suyes.
Andenla buscando.

Atapez. La tardi
ta yá apigazando
...La neña, si güelve,
¿golverá pa cuándo?

Aprobez la vida;
caltiénse, esnalando.
Cuten siete llárimes
nel campanariu.

El corazón fríu
llate pico, abaxu.
Ximielga con murria
la fueya'l carbayu.

Yo, solu, yo, solu.
Y el llar apagáu.
La calamiyera
s'esmena despaciu.

Pingo... pingo... pingo,
sonsaña l'orbayu.

 Lletra: Celso Amieva
Musica: Nuberu

XUAN

Son setenta años
que falen de la murnia
que relluma'n so cara.
Cien engurries nidies
que dancen al son
de la so sabencia.
Unes, canten l'alcordanza
de la primer lleción d'aprendía;
de les sombres que quinxeron
mustiar la verdá de la so inocencia.
Otres, del so camín adolescente;
del andar con dulces silencioses
en defensa l'amor y de la paz.
Yera un tiempu de lluces taramielles;
I'aniciu a la concencia de la vida;
el primer xingón de la llocura.
Son setenta años
que falen d'una vida
entamá ensin amoriu.
Cien engurries nidies
que dancen al son
de la so sabencia.
Asina, col altor del sol
y afincáu ena peña'l mar;
Xuan, el pescador,
manda un besu a l'humanidá.

 Letra y música: Manuel Peñayos

ATIENDI, ASTURIES
"Un pueblu ensin acordanza nun tien futuru''
E. BLOCH

Atiendi, Asturies, atiendi
lo que falo na to fala
anque nos oyíos tengas
muncha llingua castellana.
Sé que sofristi abondu
que fuisti más nueche qu'alba
que fixisti too dafechu
lo que sentíes pel alma.
Selo bien, pero'l dolor
golviósete una mordaza
dexándote a fuerza sombra
una llaceria na fala.
Esa llaceria espardióse
como una postiella gafa
fendió to llingua llariega
fasta torgate falala.
Y la hestoria que pulsiasti
cola pallabra bien alta
quedando fo callandina
como ensin alcordanza.
Y ensin alcordanza un pueblu
nun tien futuru a la llarga.
Atiendi, Asturies, atiendi
lo que falo na to fala.

Letra: Manuel Asur
Música: Nuberu

DUÉRMETE NÉ

Yes nidia y les xanes del ríu
Duérmete, né, nel mio regazu
que yes mio amor.
Duérmete, né, que yes mio amor
Si non te duermes marchen contigu.

   
Letra: Popular
Música: Popular
Del cancionero de Baldomero Fernández
Adaptación: Nuberu