1- LA MULA TORDA 2.09
 2- DAME TIRA 2.46
 3- AIDA DE LA FUENTE 4.45
 4- LLIBERAR L'AMOR 2.36
 5- LOS FUGAOS 4.33
 6- EL CHAMICERU 2.47
 7- ASTURIES: TIEMPU DE NOSOTROS 2.0
 8-  BIENVENIA A RAFAEL ALBERTI 3.20
 9- AL HOME DE LA UNIDA XUANÍN 4.56
10- POZU FUNERES 2.46

LA MULA TORDA 

Soi trenista de primera
ena mina d'El Sotón
tengo una mulina torda
que tira más qu'un benzol.

Y si delles tiren muncho
ella tira muncho más
nun-y falta namás a mio mula
que char l'aguya al pasar.

Y si escarrila'l tren
la mula mira p'atrás
como pruyéndo-y dicir 
¡si yo te fora a ayudar! 
Más un día yo vi bien (bien vi)
que la mula nun tiraba
entrugué-y a la mio mula
que si nun-y daben cebá.

Y respondióme la mula
con llárimes nos sos güeyos
la cebá yo nun la prebo
l'alfalfa yá nin la güelo. 

Teo manda-y a mio má
qu'espurra más la merienda
teo una mulina torda
quieo repartir con ella.

Lletra: popular 
Son: Nuberu

DAME TIRA

Cuando tea apechugando
per fuera de la mina
lo mesmo que per dientro
¡Compañeru, dame tira!

Cuando sepias que toi presu
per da-y llibertá a la vida
como si non lo tuviere
¡Compañeru, dame tira!

Cuando al aire los polmones
tarácelu la caliza
semeyando bon aliendu,
¡Compañeru dame tira!

Cuando me retiren ya
y sólo seya un pensionista,
igual que si trabayare
¡Compañeru dame tira!

Lletra: Manuel Asur Son: Nuberu

AIDA LAFUENTE

Deciséis años tinía
guapos años gayasperos
que xueguen y salten
semeyando xilgueros.

Yeres una neña Aida
que na rexón asturiana
xugabes dando a la comba
ú tos amigues saltaben.

Llegó la güelga d'Ochobre
fuisti revolucionaria,
tú yá nun coyisti comba,
que coyisti la metralla.
Colos pergafos mineros
qué bien tú la remanabes,
salíes colos primeros
bricando per barricaes.

Y cuando más s'encendíin
los glayíos n'amarraza
diesti col llombu na tierra,
furó to pierna una bala.

Dos mozos los comunistes
quixeron dir a salvala
¡valoratible so vida!
¡so vida de llibertaria!
Nun hubo quien lo algamara
rabiones de metralleta
sos cuerpos afuracaron
a la vera la rapaza

Yá lleguen los asesinos,
¿Tú cómo te llames guaja?
Tú dixisti puñu enriba:
¡Comunista, llibertaria!

Nun acabesti dicilo,
la to voz nun vocinglaba
del menudín del to cuerpu
fixo un cribu tanta bala.
Y esi vestidín tan guapu,
coles manches encarnaes ,
guardaránlu con gran ciñu
to má y la bona la to hermana.

Serás de los asturianos
l'exemplu de la so casta
y has ser de los mineros
so bandera proletaria.
Pola sangre que vertiesti
xorrecerán más rosales
nesta rexón asturiana ,
con roses bien colloraes.

A primeros d'Ochobre
glayarán per toa España
les mocedaes marxistes
coses de La Llibertaria.

Lletra: popular (recoyida por Díaz)
Son: Alberto del Pozo

LLIBERAR L'AMOR 

Nun folleru alcontré l'amor
Tinía los güeyos esbillaos.
La voz cimblante.
El cuerpu oriciáu.
Peles pocilgues afalaba.
Peles cantarielles xorrecía.
Polos antros amoriaba...
Esti ye l'amor que nun se fixo.
L'amor perdíu.
L'amor nun declaráu.
Dir toos a facer l'amor?
Dir toos a remanecelu.
Dexái, amantes, les alcobes,
dexái, monxes, el llupanar.
Salíi, maníacos, del oligopoliu.
Que naide seya de naide
pa que toos faigan l'amor.

Lletra: Manuel Asur
Son: Nuberu

LOS FUGAOS

Pelos montes d'Asturies
allá pelos años 40
pasaben estes coses
que yeren realidá
y güei naide cuenta.

Calza Xulián los zapatos
y baxa a la población
a la gueta de tricornios
que vaiguen por Colasón.

Colasón yera forníu
sigún la xente dicía
va demostravoslo agora
esguilando peña p'arriba.

Yá pasa la brigadilla
a la gueta los fugaos,
cimblando van toos de llerza:
¡son comunistes nomaos!
Antón cola metralleta,
la dinamita Colas,
puxéron-y fueu al monte
y el peñón echó a rodar

ESTRIBILLO
Antón encendió la mecha
prendióla con picardía,
entrasvióse'I peñón,
la brigadilla a la vía.

Ensamaren biesca arriba
y enriba de l'Angariella
Antón agüeyó p'abaxo
dixo: ''¡Dios míu qu'esfuella!"

Antón cola metralleta
la dinamita Colás
cuando asomen pela cueva
ponse'I facismu a tremar.

EL CHAMICERU

Cuando me llevabin presu
a la cárcel de Llaviana
entrugóme el Siñor Xuez:
"¿a ú vas mio fíu del alma?"

"Mire Siñor Xuez, teo que-y lo contar
yo teo una tierruca y quíxela semar"

Ena güerta que yo teo
púnxime a semar bien ceo
y una veta de carbón
embarbióme'l llabriegu.

Y yo semé les pataques
y recoyí carbón
y vi que la tierruca
dábame produción.

Teo una moza
enriba Les Bories
con una de vaques
que fan cabaná.

Dan muncho llechi
les vaques, les vaques
dan muncho llechi
piénselo Vd., Siñor Xuez.

Sáqueme d'esti apuru
arregle la esplotación
usté tendrá llechi, y de xuru,
nun ha de falta-y carbón.

Nun t'apures Xuacu
veré qué facer
nun t'escaezas del llechi
que de l'otro ya te falaré.

ASTURIES TIEMPU DE NOSOTROS

Xorrecíes tán les manes,
xorrecíu va El Nalón:
faigamos un ríu toos
coles manes del mugor.

Empuercáronte los díis,
Asturies, cabezalera,
Asturies la del trabayu,
facedora de la lluz...!

Pero yá nun t'escaezas
d'un camín abondu andáu:
siempre ye nuestru'l futuru...
de la razón de los más.

Y por ti taremos xuncíos
na estaya d'afirmamos,
de vociar los nuestros nomes
colos nuestros apellíos...

De xuro perbién sabemos
que la llibertá nun cabe
nin nel mieu, nin nes murnies,
nin nos mesmos ataúdes...

Siempre que marchen los pies,
y atopen les manes, manes
ye'l tiempu de nosotros,
tiempu d'afirmación...
Taremos xuntos dafechu
na mañana de la fuerza;
que n'Asturies ye la hora
de la llucha y el llabor.

Lletra: Xuan Marcos
Son: Nuberu

BIENVENÍA A RAFAEL ALBERTI

Dende'l Norte Rafael
al to canciu marineru
mándo-y yo esta toná
fecha con fuelle mineru.

Al to canciu bogaor
en tierra porque los remos
que tú punxisti na mar
lleváronlos campu adientro.

¿Quién t'arrincó, Capitán,
de les foles y del puertu?
Fueron gaviotes llandies
coles coraes de cuervu.

Aquelles mesmes qu'un día
dende'l Sur al Norte fueron
cola peste na so boca
y un desiertu nos güeyos.

Descansa yá, Capitán,
golvéi a la mar, marineros,
qu'una alborá de gües
yá vela pelos esteros.

Lletra: Manuel Asur
Son: Nuberu

AL HOME DE LA UNIDÁ, XUANÍN
Qué probe quedó'l ríu Güerna
qué probe'l so valle verde
si vida dieron sos agües
muerte dieron les orielles.

Nun maldigo yo'l to nome
ríu que nun yes inocente
nun quiero sinón que sepas
qu'Asturies ya ná te debe.

Pos si disti lluz a un home
d'alboraes llampisteru
mal-y pagasti el s'oficiu
cola tarde de xineru.

El que yera una campana
axuntando los mugores
y llabraor de llibertaes
dende dientro les prisiones.

Golverá, Xuanín, to voz
siempre al tayu solidariu
obreru de la esperanza
y del dolor unitariu.

Lletra: Manuel Asur
Son: Nuberu

POZU FUNERES

A los mártires republicanos aventaos vivos a la sima
del Pozu FUNERES. Xunto la so boca
xorrez un texu, símbolu protetor del Llar asturianu
y únicu testigu de tolo que sucedió de verdá entós.

Pela sima onde los vuestros güesos suañen
cien mil glayíos insumisos xorrecerán
y col aceru encarnispáu de les peñes
francerán la so blindá soledá.

Empozaréis con tol vuestru pueblu
la guxanera facista de la paz
y na esperanza acuchillá'l vuestru cuerpu
darréu puxará la llibertá.

Amestaránse les vuestres manes proletaries
nel verdor ensin fin de los praos
y de nueu les vuestres frentes llibertaries
asoleyarán los soles del ocasu.

Yá naide arreyerá el coral de los vuestros brazos
a los ñicios de la muerte desarreyá
y la murnia del texu namoriscáu
so eternidá republicana gayolará.
Lletra: Manuel González García