Día de Lletres y Música | Imprimir |
10/05/08

L´Academia de la Llingua Asturiana cellebró ayeri nel Teatru Campoamor l´actu institucional de les Lletres Asturianes, col homenaxe a la música asturiana y l´ingresu de la poeta Berta Piñán como miembru de númberu de l´Academia.

Nel so discursu institucional, nel que una vegada más pidió la oficialidá del asturiano, la  Presidenta de l´Academia Ana Cano refirióse asina al calter honorífico del actu d´ayeri: “Nós, y albidro que tolos que me sentís tamién, queremos facer esti sentíu y merecíu Homenaxe a la Música Asturiana, dende llueu pola so calidá, pero tamién, y ello nun ye menos valoratible, pol importante papel que tien y sigue teniendo nel procesu de recuperación llingüística y de normalización social del idioma del país, dada la so capacidá y les sos posibilidaes pa coneutar con un bayurosu númberu de ciudadanos y ciudadanes, pa llegar a públicos estremaos que van dende’l más militante al que nun lo ye tanto, dende’l que rispe pola recuperación de lo popular al que prefier les composiciones más cultes, dende’l más clásicu al de gustos más anovaos.”

 

 Nuberu, ayeri nel Teatru Campoamor d´Uviéu./ www.asturnews.com

 

 

 

La poeta Berta Piñán ingresó como miembru de númberu de l´Academia con unes pallabres, como toles suyes, cargaes de verdá y belleza: “Un día entré nesta casa llevantada con palabres antigües, con xeneraciones de palabres que per primer vez desurdíen pa min de la escuridá y del olvidu como si otra vuelta'l mundu fuera un llugar por estrenar, y ellí atopé ónde quedame.”

La música de Nuberu, Dixebra, Llan de Cubel, Carlos Rubiera y Los Berrones pusieron el restu.

Ya en 1997, nel XVIII Día de les Lletres Asturianes, l´Academia fizo un actu institucional n´ homenaxe a Nuberu. D´aquel actu de fai once años, rescatamos les pallabres de Carlos Lastra: “Nuberu supo rescatar, con un trabayu de cálida y perbién fechu, una parte de la tradición popular, pa devolvé-yla al pueblu acuriosada nel estilu musical del momentu, siendo n´Asturies auténticos pioneros na esploración de nueves formes de música popular.”

Ayeri dieron bona muestra nel Campoamor.